Casati, Paolo Mechanica 1684

author index 468 / 815      search

452
innui, ad alias motiones corporum elevandorum (ut si ex navi
in altiorem fluminis ripam onus transferendum esset) facilè
traduci posse ita manifestum est, ut pluribus non sit opus, si
accuratè examinetur altitudo, ad quam deducendum est, &
amplitudo seu distantia parallelarum, intra quas obliquus mo­
tus perficiendus est, ut vecti congrua longitudo statuatur, &
opportuno loco collocetur, ubi eam anguli RPZ inclinatio­
nem habeat, cui Sinus Versus RN respondeat.

CAPUT XIV.

Remorum vires in agendâ navi expenduntur.

REmum, quo naves aguntur, Copensibus, & Platæensibus
debemus, ut Plinius lib. 7 cap. 56. scribens ait, Remum
Copæ, latitudinem ejus Platææ (utraque est Bœotiæ urbs) inve­
nerunt; & nomen ipsum ab inventoribus inditum videtur, nam
Græcis χώπη Remus, πλάτη Palmula, latior scilicet remi pars
dicitur. Ratem siquidem conto propellere rudis adhuc ars nau­
tica noverat, ubi fluminis non admodum alti fundum perticâ
pertentare licebat; at ubi uberior unda prohibet, ne fundum

attingatur, operam luderet, qui navim
conto AB impellere se posse sibi per­
suaderet, nisi fortè extremitati B ligneam
tabellam adjungeret, ita levem, ut
sponte suâ innataret; illam enim per
vim velociter immergenti obliquam,
aqua resisteret, & navis aliquantulum
promoveretur: cæterum ingens esset
labor in conto retrahendo, & tabellâ ex
aquis extrahendâ, etiamsi scalmo tigil­
lus longiusculus EF ad perpendiculum
infigeretur, ex cujus summo vertice
funis EI penderet, fune autem contus
medius in I suspenderetur. Quare opus fuit instrumentum