Casati, Paolo Mechanica 1684

author index 19 / 815      search

3
cem recedant, æquum fuit, ut quæ plus habent materiæ atque
substantiæ sub minori mole, in angustiore spatio collocarentur;
ea verò, quæ sub majoribus dimensionibus continentur, am­
pliora spatia occuparent, ubi radij magis distant: ut videlicet
hac ratione æqua substantiæ distributio fieret in totâ sphærâ.
Hinc vides, cur idem corpus, eo ipso quod rarum fit, ascendat,
ut aqua in vaporem resoluta (nisi aliunde ad descendendum
determinetur, ut aurum fulminans) quia materies eadem sub
majoribus dimensionibus petit longiùs abesse à centro, ibiquè
tantisper conquiescit, dum constipata, atque minorem in mo­
lem redacta, iterum descendat.

Quare centrum hoc, quod motus, vel quies corporum respi­
cit, dicitur Centrum gravium, & levium; atque idem creditur
esse cum centro universi: vel saltem (ne parùm utili nos dispu­
tatione torqueamus) centrum eorum, quæ in hac sphærâ ele­
mentari gravia, aut levia dicuntur, idem est cum centro ter­
raquei hujus globi, ut quotidiana docet experientia: quicquid
sit, an pars lunaris globi, si à lunâ sejungeretur, reditura esset
ad lunam, ut ad centrum sui motus. Tam itaquè, quæ hujusmo­
di centro proxima sunt, deorsum posita dicuntur, sursum verò,
quæ ab eo longiùs collocata sunt. Hinc telluris superficiei in­
sistentes caput sursum, pedes deorsum habere dicimur. Ille
verò, quamvis rectus, & pedes, & caput sursum haberet, cu­
jus umbilicus huic centro universi congrueret. Per quod pa­
riter centrum si scala ducta intelligatur, duo possent sibi non
occurrere invicem, licet alter ascenderet, alter descenderet;
hic siquidem accederet ad centrum, ille inde recederet: per
eam verò posset uterque ascendere, & tamen licet, æquali mo­
tu moverentur, semper invicem distarent magis, quò à centro
ad oppositas partes recederent.

CAPUT II.

An corpora prædita sint gravitate, & levitate.

INter ea, quæ planè homogenea sunt, ordo esse non potest à
naturâ institutus: hinc si nulla esset corporum dissimilitudo,