Casati, Paolo Mechanica 1684

author index 43 / 815      search

27

CAPUT V.

Quâ ratione centrum gravitatis corporum
inveniatur.

OPus mechanicum plerunque non indiget puncto illo,
quod intra corporum soliditatem latet, ac centrum gra­
vitatis definivimus; sed satis est si in extimâ corporis superfi­
cie innotescat punctum, aut linea imminens ipsi gravitatis
centro, pro ratione sitûs, in quo corpus grave consistere cu­
pimus. Ideo geometricum laborem inveniendi punctum illud
intimum Centrobarycæ relinquens, mechanica tantùm inqui­
sitione, & quasi tentans, pervestigo punctum illud, aut li­
neam in corporis superficie, cui respondet planum per lineam
directionis ductum, & secans corpus in certo situ constitu­
tum. Et quidem si corpus sphæricum fuerit ex partibus ejus­
dem naturæ conflatum, aut saltem ex partibus heterogeneis
quidem, sed circa sphæræ centrum similiter dispositis ita, ut
intima sphærula folliculis quibusdam obvolvatur; quia idem
est molis atque gravitatis centrum, punctum quodcumque in
sphærica superficie assumatur, aptum erit; singula enim si­
milem habent positionem. Sin autem aut sphæræ segmentum,
aut sphæra ex partibus heterogeneis inæqualiter dispositis fue­
rit; imponatur plano horizontali accuratè levi, & maximè æqua­
bili; & quod punctum tangetur à supposito plano, ubi motus
omnis cessaverit, illud est, quod potissimùm quæritur, ac
punctum superius, quod huic è regione est, erit pariter aptum
ad propositum finem.

Quod si cylindricum fuerit oblatum corpus, aut prisma quod­
cunque continuo, & simili ductu productum; secetur bifariam
longitudo, & punctum habebitur cylindri centro gravitatis
respondens: prismatis autem singula plana parallelogramma si
dividantur in æquas tum longitudinis, tum latitudinis partes,
planum per inventa puncta ductum transibit per centrum
gravitatis prismatis, dividet enim in partes æquales, & simi­
liter positas, unde oritur momentorum gravitatis æqualitas.