Baldi, Bernardino In mechanica Aristotelis problemata exercitationes 1621

author index 181 / 214      search

situla suspenditur FCABG, situla vero G. Est igitur dia­
meter CED, instar libræ, quare vt fiat æquilibrium neces­
se est capiti funis F, potentiam applicare, quæ sit æqualis

pondere situlæ aqua plenæ, itaque extra­
hens proprijs viribus corporis pondus ad­
ijciens facile situlam aqua plenam extra­
hit, ex qua re magna extrahentibus fit
commoditas. Patet autem diuerso modo
extrahentes iuuare Celonium. & Tro­
chleam, ibi enim corporis mole adiuuatur
demittens vacuam, hic vero qui extrahit
plenam aqua situlam.

Cæterum Celonij partem BC, qui à
fulcimento ad funem longe maiorem es­
se oportet, ipsa AB, vt situla in profundum possit demitti,
quamobrem ita se debet habere pondus in A, ad pondus
situlæ plenæ, vt se habet brachium seu pars BC, ad par­
tem BA. Tunc enim ex permutata proportione efficitur
æquilibrium.

Illud addimus, nouum non aesse Architectis Mecha­
nicisque, tum hominum tum animalium vt commodius
machinas moueant, adhibere pondera corporum. Nec e­
nim alia ratione mouentur Rotæ illæ, quas ob hanc caus­
sam ambulatorias vocant; quarum vsus ad Mangana, ad
extrahendas è puteis aquas, & ad farinarias quoque mo­
las agitandas adhibetur.

Porro Tollenonem bellicam Machinam à Celonio
tum forma tum potestate nihil differre, videre est apud
veteres Mechanicos, Heronem Byzantium, & alios. apud
neotericos vero hac de re agunt Daniel Barbarus in Vi­
truuium, & Iustus Lipsius in librum quem de bellicis
machinis edidit, elegantissi­
mum.